Есөнзүйл сумын Орон нутгийн хөгжлийн сангийн 2025 оны санхүүгийн үйл ажиллагаанд хяналт шалгалт хийсэн тухай

        Санхүүгийн хяналт, дотоод аудитын газрын 2026 оны 06 дугаар сарын 11-ны өдөр баталсан 29/10 дугаар удирдамжийн дагуу Есөнзүйл сумын Орон нутгийн хөгжлийн сангийн 2025 оны санхүүгийн үйл ажиллагаанд 2026 оны 06 дугаар сарын 15-ний өдрөөс 5 хоногийн хугацаанд хийж гүйцэтгэлээ.

            Орон нутгийн хөгжлийн сангийн санхүүгийн үйл ажиллагаа, худалдан авах ажиллагаа, нягтлан бодох бүртгэлийн үйл ажиллагаа хэвийн явагдаж иржээ. Гэвч 2025 онд малын тоо толгойн албан татварын орлогоор хийгдэх иргэдээс нэмэлтээр ирсэн саналыг багийн иргэдийн нийтийн хурлаар хэлэлцүүлээгүй, эрэмбэлсэн саналын тоо иргэдээс ирүүлсэн саналын тооноос зөрүүтэй, иргэдээс саналын хуудас авахдаа иргэдээс хангалттай хэмжээний санал аваагүй, 2 дугаар багын Засаг даргаас сумын Засаг даргад хүргүүлсэн санал эрэмбэлсэн жагсаалт хүргүүлэх тухай албан тоот огноо, дугааргүй, тухайн онд хэрэгжсэн хөрөнгө оруулалт, хөтөлбөр, төсөл, арга хэмжээнд сумын Иргэдийн төлөөлөгчдийн хурлаас хяналтыг бүрэн тавьж ажиллаагүй, хөрөнгө зарцуулах шийдвэр гаргахдаа аль зардлаас гаргахыг тодорхой тусгаагүй, ашиг сонирхлын зөрчилгүй гэдгээ илэрхийлэх мэдэгдлийг дутуу бөглөсөн, тухайн ажлуудыг хүлээн авах ажлын хэсгийг томилсон тушаал байхгүй зэрэг зөрчлүүд гарсан нь “Төсвийн тухай”, “Төрийн болон орон нутгийн өмчийн хөрөнгөөр бараа, ажил үйлчилгээ худалдан авах тухай” хуулиуд, Монгол Улсын Засгийн газрын “Жишиг хэмжээг шинэчлэн тогтоох тухай” 2010 оны 10 дугаар сарын 20-ны өдрийн 271-р тогтоол, Орон нутгийн хөгжлийн сангийн журмын заалтуудыг үйл ажиллагаандаа бүрэн гүйцэд мөрдөж ажиллаагүйтэй холбоотой байна. Цаашид давтан гаргахгүй байх 6 заалт бүхий зөвлөмжийг ажиллалаа.